Канон трём святителям: Василию Великому, Григорию Богослову и Иоанну Златоустому
Предлагаем для домашней молитвы канон святым вселенским святителям и учителям: Василию Великому, Григорию Богослову и Иоанну Златоусту, чью память Православная Церковь празднует сегодня. Для удобства навигации можно использовать ссылки на каждую песнь канона, представленные ниже.
Кано́н — это особый жанр Православной богослужебной гимнографии, основанный на библейских песнях и посвящённый прославлению какого-либо праздника или святого. Канон входит в состав Утрени (обычно во время этой службы соединяются сразу несколько канонов) и некоторых других Богослужений, а также может совершаться на молебнах и в келейной (домашней) молитве. Полный канон состоит из девяти частей — песней, однако все девять песней используются редко, каждая песнь содержит несколько тропарей, каждый из которых предваряется определённым припевом.
Песнь 1 · Песнь 3 · Седален · Песнь 4 · Песнь 5 · Песнь 6 · Кондак и икос · Песнь 7 · Песнь 8 · Песнь 9 · Светилен · Молитва
Песнь 1.
Ирмо́с, глас 8: Колесницегони́теля фарао́ня погрузи́/ чудотворя́й иногда́/ Моисе́йский же́зл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,// пе́снь Бо́гови воспева́юща.
Припев: Святи́телие Васи́лие Вели́кий, Григóрие Богослóве, Иоáнне Златоýсте, моли́те Бо́га о на́с.
(или: Святи́телие Христо́вы, моли́те Бо́га о на́с).
Не челове́ческаго тща́ния исправле́ние сие́ начина́ние, но Твоему́ престо́лу приседя́щая, Человеколю́бче, Прему́дрость да споспешеству́ет ми́, сло́ва благода́ть даю́щи, е́юже просла́вити возмогу́, и́хже сама́ до́бре предпросла́ви.
Припев: Святи́телие Христо́вы, моли́те Бо́га о на́с.
Я́коже ча́ша, преисполня́ется, Влады́ко, благода́ть Твоя́, и мно́гое бога́тство человеколю́бия Твоего́ излия́ется и потече́, я́коже и и́ны а́нгелы в соста́ве пло́ти показа́ти, ны́не предлежа́щия в похвалу́.
Сла́ва Отцу́ и Сы́ну и Свято́му Ду́ху.
С небесе́ небе́сным подоба́ше бы́ти и похвала́м, а́нгельское пе́ние, боже́ственным прили́чное: бо́зи бо прича́стием, и́же естество́м и Еди́наго и́стиннаго Бо́га иму́ще в себе́, живу́ща и веща́юща.
И ны́не и при́сно и во ве́ки веко́в. Ами́нь.
Богородичен: Па́мять преподо́бных богому́дрое сосло́вие с похвала́ми соверша́ет, с ни́миже и Бо́жия Ма́терь, я́ко те́х глава́, в ле́поту спрославля́ется, коне́чный, и пе́рвый, и сре́дний чи́н содержа́щи и благохвале́ния причаща́ющися.
Песнь 3.
Ирмос: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя́, Христе́, за́поведей Твои́х утверди́,/ я́ко не́сть свя́т, па́че Тебе́,// Еди́не Человеколю́бче.
Припев: Святи́телие Христо́вы, моли́те Бо́га о на́с.
И́же нра́вов испра́вителие и ду́ш строи́телие, спаси́телие о́бщии все́х, и́же и дея́ний на́м и слове́с о́бразы показа́вше, наказа́телие жития́ све́тлии, све́тле да восхва́лятся.
Припев: Святи́телие Христо́вы, моли́те Бо́га о на́с.
Ду́х Бо́жий испо́лни Васи́лия худо́жества; о́гненных же имя́ше язы́ков еди́н Григо́рий и огне́м высокоре́чия дхне́; Христо́ва же уста́ во Иоа́нне глаго́лаху.
Сла́ва Отцу́ и Сы́ну и Свято́му Ду́ху.
Ны́нешняго ве́ка му́дрость бу́йство про́поведи я́ве упражня́емую и́мать, повину́ющуюся ему́ и ра́бски служа́щую: пропове́дники бо благода́ть му́дрыя предлага́ет ри́торы.
И ны́не и при́сно и во ве́ки веко́в. Ами́нь.
Богородичен: Во утро́бе Чи́стыя Де́вы Всели́выйся, ду́ши богоно́сных святы́х жили́ще твори́т и о́ных устна́ми е́же о Ма́тери сказу́ет та́инство.
Седален, глас 8.
Вели́кия свети́льники светоза́рныя, Це́ркве столпы́ неразори́мыя согла́сно да восхва́лим, и́же до́брых наслажда́ющиися и слове́с те́х, ку́пно и благода́ти: прему́драго Златоглаго́лива и Вели́каго Васи́лия с Григо́рием све́тлым Богосло́вом. К ни́мже и возопии́м, от се́рдца зову́ще: святи́телие тревелича́йшии, моли́теся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять ва́шу.
Сла́ва Отцу́ и Сы́ну и Свято́му Ду́ху.
Прему́дрость прие́мше от Бо́га, я́ко апо́столи ини́и трие́ Христо́вы, сло́вом ра́зума составля́ете догма́ты, я́же пре́жде словесы́ просты́ми низлага́ху, ры́барие в ра́зуме си́лою Ду́ха, подоба́ше бо та́ко про́стей на́шей ве́ре составле́ние стяжа́ти. Отню́дуже вси́ вопие́м ва́м: моли́теся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять ва́шу.
И ны́не и при́сно и во ве́ки веко́в. Ами́нь.
Богородичен: Ду́шу мою́, Де́во, смире́нную, бу́рею жития́ искуше́ний ны́не я́ко кроме́ управле́ния бы́вшую, потопля́емую волна́ми, грехо́в бре́менем я́вльшуся преиспо́лнену и во дно́ а́дово приити́ бе́дствующу, предвари́, Богоро́дице, моли́тв Твои́х ми́лостию, тишину́ подаю́щи и бе́д изыма́ющи. Приста́нище бо Ты́ еси́ небу́рное, моля́щися Сы́ну Твоему́ и Бо́гу прегреше́ний оставле́ние дарова́ти ми́: Тя́ бо и́мам наде́жду, недосто́йный ра́б Тво́й.
Песнь 4.
Ирмос: Ты́ моя́ кре́пость, Го́споди,/ Ты́ моя́ и си́ла,/ Ты́ мо́й Бо́г, Ты́ мое́ ра́дование,/ не оста́вль не́дра О́тча/ и на́шу нищету́ посети́в./ Те́м с проро́ком Авваку́мом зову́ Ти́:// си́ле Твое́й сла́ва, Человеколю́бче.
Припев: Святи́телие Христо́вы, моли́те Бо́га о на́с.
Сто́лп о́гнен, лю́дем ве́рным предваря́ющий и опаля́ющий враги́ ве́ры, племена́ же спаса́яй, изве́стно после́дующия, вели́кий яви́ся Васи́лий, да дерза́ет и побежда́ет Христо́ва Це́рковь, толи́ким обогати́вшися побо́рником.
Припев: Святи́телие Христо́вы, моли́те Бо́га о на́с.
Язы́ка сла́дость и слу́ха вся́каго услажде́ние, твое́ сло́во бы́сть, Григо́рие, ма́нна жи́зни, роса́ сла́дкости, ме́д, и́же из ка́мене, а́нгельский хле́б небе́сный, несы́тно насыща́тися услажде́ния его́ увещева́я и исполня́яй сла́дости причаща́ющияся.
Сла́ва Отцу́ и Сы́ну и Свято́му Ду́ху.
Река́ дарова́ний духо́вных напо́лнися да́же и до разли́тия, и до́брое лице́ земли́, я́ко сла́достный пото́к, от златы́х напая́ет у́ст, веселя́щи и утучня́ющи Христо́в вся́кий гра́д Боже́ственных во́лн струя́ми.
И ны́не и при́сно и во ве́ки веко́в. Ами́нь.
Богородичен: Естество́, про́сто стерпе́вшее сложе́нию и я́вльшееся вы́шше сли́тия в Твое́м, Влады́чице, Сы́не, трие́ богоно́снии учи́телие испове́даша, от двою́ во́лю и сугу́баго де́йства, сугу́ба по естеству́ пропове́давше.
Песнь 5.
Ирмос: Вску́ю мя́ отри́нул еси́/ от лица́ Твоего́, Све́те незаходи́мый,/ и покры́ла мя́ е́сть чужда́я тма́, окая́ннаго,/ но обрати́ мя и к све́ту за́поведей Твои́х// пути́ моя́ напра́ви, молю́ся.
Припев: Святи́телие Христо́вы, моли́те Бо́га о на́с.
И́же Боже́ственных веще́й и челове́ческих му́дрыя хитрецы́, и́же су́щих естества́ любои́стинне я́ве на́м извести́вшия и Зижди́теля те́х все́м сказа́вшия я́ко ле́по, благода́рными гла́сы восхва́лим.
Припев: Святи́телие Христо́вы, моли́те Бо́га о на́с.
Го́рькое и те́рпкое я́же ко спасе́нию лече́б услади́ша му́дрыми слове́с уче́ньми же, и хитростьми́, и благода́тьми, ду́ш боже́ственнии лечи́телие: наслажда́йтеся, вси́ благочести́вии, и, красу́еми, спаса́йтеся.
Сла́ва Отцу́ и Сы́ну и Свято́му Ду́ху.
Молчи́т вся́ко сло́во, богопропове́дником глаго́лющим Боже́ственная, и удержава́ет над Ве́тхим заве́том Но́вый, предлага́ющий честны́я скрижа́ли, и́же в не́м законополага́ющих, к ни́мже причита́ется все́ ве́рных сосло́вие.
И ны́не и при́сно и во ве́ки веко́в. Ами́нь.
Богородичен: Безсме́ртное естество́ сме́ртное претече́ во святы́ню, и Де́ва Отрокови́ца безпло́тныя а́нгелы превзы́де, я́ко Бо́га ро́ждшая, Царя́ а́нгельскаго, на Него́же зре́ти о́нем невозмо́жно.
Песнь 6.
Ирмос: Очи́сти мя́, Спа́се,/ мно́га бо беззако́ния моя́,/ и из глубины́ зо́л возведи́, молю́ся,/ к Тебе́ бо возопи́х, и услы́ши мя́,// Бо́же спасе́ния моего́.
Припев: Святи́телие Христо́вы, моли́те Бо́га о на́с.
Тро́ицу еди́нственную богосло́вити научи́хомся, Еди́ницу Тро́ичную пе́ти прия́хом, покланя́тися навыко́хом от отце́в Еди́ному Естеству́ Триипоста́сному.
Припев: Святи́телие Христо́вы, моли́те Бо́га о на́с.
Сло́во бе́ в нача́ле, ко Отцу́ Собезнача́льное, и Ду́х Бо́жий Бо́г бе́ Пребезнача́льный, про́сто, единосу́щно, соесте́ственно Божество́, я́ко боже́ственнии глаго́лют пропове́дницы.
Сла́ва Отцу́ и Сы́ну и Свято́му Ду́ху.
Совокупля́ю, и разделя́ю, я́же совокупле́нне разделя́емая, Еди́но Неразде́льно помышля́ю и Три́ мню́: учи́тели прие́млю три́ богоно́сныя, та́ко увещава́ющия мя́ ве́ровати.
И ны́не и при́сно и во ве́ки веко́в. Ами́нь.
Богородичен: Безма́терний пре́жде пло́ти, безо́тчий же по воплоще́нии, Сы́н О́тчий и Ма́терний, и́же сия́ нарица́яй па́че ума́ обоя́: Бо́гу бо подоба́ют чуде́с пресла́вная.
Кондак, глас 2.
Свяще́нныя и боговеща́нныя пропове́дники,/ ве́рх учи́телей, Го́споди,/ прия́л еси́ в наслажде́ние благи́х Твои́х и упокое́ние:/ труды́ бо о́нех и сме́рть прия́л еси́ па́че вся́каго всепло́дия,// Еди́не, прославля́яй святы́я Твоя́.
Икос.
Кто́ дово́лен своя́ устне́ разве́рзти и подви́гнути язы́к к ды́шущим огне́м си́лою Сло́ва и Ду́ха? Оба́че толи́ко рещи́ дерзну́: я́ко все́ преидо́ша челове́ческое естество́ си́и трие́ мно́гими и вели́кими дарова́ньми, дея́нием же и виде́нием, по обоему́ све́тлы превозше́дше. Те́мже зело́ вели́ких даро́в ты́я сподо́бил еси́, я́ко ве́рныя Твоя́ служи́тели, Еди́не, прославля́яй святы́я Твоя́.
Песнь 7.
Ирмос: Бо́жия снизхожде́ния/ о́гнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице лику́юще, поя́ху:// благослове́н еси́ Бо́же, оте́ц на́ших.
Припев: Святи́телие Христо́вы, моли́те Бо́га о на́с.
Молча́щии и зову́щии, ви́димии же и слы́шимии, доброде́тели и му́дрости, богоглаго́ливии, столпы́ бы́ша, де́лом и сло́вом вопи́ти повелева́юще: благослове́н Бо́г оте́ц на́ших.
Припев: Святи́телие Христо́вы, моли́те Бо́га о на́с.
Бо́жия гла́сы, свы́ше возгреме́вшия на́м пречу́дно, мо́лнии же лучи́, и́же ва́ша веща́ния прие́млюще, всему́дрии, ку́пно у́бо пое́м с ва́ми: благослове́н Бо́г оте́ц на́ших.
Сла́ва Отцу́ и Сы́ну и Свято́му Ду́ху.
Испуще́ни бу́дут гра́ди от каменопра́щных язы́ков, сокруша́ющии гнила́я уче́ний, а́ще кто́ посреде́ де́рзнет суесло́вников, пра́вая не веща́я: благослове́н Бо́г оте́ц на́ших.
И ны́не и при́сно и во ве́ки веко́в. Ами́нь.
Богородичен: В Тя́, Де́во, всели́ся и по рождестве́ Де́ву оста́ви И́же устроя́яй стихи́и и претворя́яй естества́, я́коже хо́щет, Богороди́тельнице Мари́е. К Нему́же вопие́м с Тобо́ю, Всенепоро́чная: благослове́н Бо́г оте́ц на́ших.
Песнь 8.
Ирмос: Седмери́цею пе́щь/ халде́йский мучи́тель,/ Богочести́вым неи́стовно разжже́;/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те, свяще́нницы, воспо́йте,// лю́дие, превозноси́те во вся́ ве́ки.
Припев: Святи́телие Христо́вы, моли́те Бо́га о на́с.
Я́же Бо́г соедини́в во единоче́стнем едине́нии, похвали́тель да не разлуча́ет челове́к, но ра́вны непщу́я в те́хже дарова́ниих, ра́вных и пе́ний песнопоя́й да сподо́бит: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Припев: Святи́телие Христо́вы, моли́те Бо́га о на́с.
Си́льнии и непобори́мии Божества́ спобо́рницы и и́стины нелжи́вии споспе́шницы, глубины́ Ду́ха до́бре испыта́вше, боголе́пная о Бо́зе разуме́ния отту́ду составля́ют и уча́т пе́ти: лю́дие, превозноси́те Христа́ во вся́ ве́ки.
Благослови́м Отца́, и Сы́на, и Свята́го Ду́ха Го́спода.
С небесе́ у́бо велича́йшая два́ свети́ла просвеща́ют по прее́мству дру́г дру́га подсо́лнечную; от земли́ же светле́е всю́ вселе́нную озаря́ют три́ по тому́жде превели́кая свети́ла, светя́ще с дру́г дру́гом и пою́ще ку́пно: лю́дие, превозноси́те Христа́ во ве́ки.
И ны́не и при́сно и во ве́ки веко́в. Ами́нь.
Богородичен: На́с ра́ди воплоще́ние и стра́сти честны́я, на́с ра́ди Бо́г с ме́ртвыми бы́сть, сме́рти у́бо невку́сен, я́ко страсте́й свобо́ден, к пло́ти же сме́ртней обще́нием глаго́лемый, и стра́сти причасти́ся, и сме́рти, с не́юже превозно́сим Христа́ во ве́ки.
Песнь 9.
Ирмос: Ужасе́ся о се́м не́бо,/ и земли́ удиви́шася концы́,/ я́ко Бо́г яви́ся челове́ком пло́тски/ и чре́во Твое́ бы́сть простра́ннейшее небе́с./ Те́м Тя́, Богоро́дицу,// А́нгелов и челове́к чинонача́лия велича́ют.
Припев: Святи́телие Христо́вы, моли́те Бо́га о на́с.
Возвы́сися Тро́ичная доброде́тель и вся́ческая сла́вы испо́лни, ину́ю лучу́ на́м возсия́вши трисве́тлу, я́ко свое́ осия́ние, небе́сныя тайноводи́тели, и́миже на Боже́ственное о́ныя виде́ние, благоче́ствующе, наставля́емся.
Припев: Святи́телие Христо́вы, моли́те Бо́га о на́с.
Не е́сть вто́рство в трие́х си́х, старе́йшинства бо ки́йждо и́х но́сит, пе́рвый не сы́й, и единочестны́я превы́шшая: присвоя́ют же па́че дру́г дру́га побе́ду прера́достно, не вмеща́ется бо зде́ за́висти де́рзость, растлева́ющия единомы́слие.
Сла́ва Отцу́ и Сы́ну и Свято́му Ду́ху.
Отце́в благоче́стие, своя́ перворо́дныя сы́ны показа́вшее, ча́да возражда́ет све́ту при́сная и непоро́чная те́ми, соверша́емая Ду́хом, жи́знь глаго́лавшим в ни́х, и це́л соблюда́ти испроша́ет до конца́ ми́р, его́же от ни́х насле́дствова.
И ны́не и при́сно и во ве́ки веко́в. Ами́нь.
Богородичен: Сы́на Бо́га жива́го му́дрых учи́телей ве́рх пропове́да, Твоего́ Сы́на, от открове́ния О́тча, не от пло́ти и кро́ве сие́ тайноуве́дав, Ма́ти Бо́жия. Те́мже Тя́ и Де́ву просла́вив, Ма́терь и Богоро́дицу возвели́чи.
Светилен.
Три́ светоза́рныя свети́льники, па́че со́лнечных лу́чь от Светонача́льныя Тро́ицы и Трисо́лнечныя Еди́ницы, преесте́ственно сме́шены, богоно́сныя восхва́лим отцы́.
Сла́ва Отцу́ и Сы́ну и Свято́му Ду́ху.
Све́та прия́телища, светолу́чныя мо́лнии, Васи́лия ны́не Вели́каго, Григо́рия Богосло́ва, Златоу́стаго Иоа́нна, да восхва́лим вси́.
И ны́не и при́сно и во ве́ки веко́в. Ами́нь.
Богородичен: Еди́нственное Божество́, Отче, Сы́не и Ду́ше, мольба́ми Васи́лия, Григо́рия и Иоа́нна и Пречи́стыя Богоро́дицы да не отлучу́ся Твоея́ сла́вы.
Молитва.
О, пресве́тлии свети́льницы Це́ркве Христо́вы, Васи́лие, Григо́рие и Иоа́нне, све́том правосла́вных догма́тов вся́ концы́ земли́ озари́вшии и мече́м сло́ва Бо́жия ху́льных смуще́ния и шата́ния ересе́й угаси́вшии; припа́дающе к ва́шему милосе́рдию, с ве́рою и любо́вию из глубины́ души́ вопие́м: предстоя́ще Престо́лу Пресвяты́я, Единосу́щныя, Животворя́щия и Неразде́льныя Тро́ицы, за Ню́же сло́вом, писа́нием и житие́м до́бре подвиза́стеся и ду́ши своя́ полага́сте, всегда́ моли́теся Е́й, да укрепи́т и ны́ в Правосла́вии и единомы́слии, и непоколеби́мем да́же до сме́рти испове́дании ве́ры Христо́вы, и во вседуше́внем послуша́нии Его́ Це́ркви Святе́й: да препоя́шет ны́ с высоты́ си́лою на вся́ неви́димыя и ви́димыя враги́ на́ша: да соблюде́т Це́рковь Свою́ незы́блему от неве́рия, суеве́рия, ересе́й и раско́ла; да да́рует архипа́стырем на́шим здра́вие, долгоде́нствие и во все́м благо́е поспеше́ние; па́стырем на́шим да пода́ст духо́вное трезве́ние и ре́вность о спасе́нии пасо́мых; прави́телем су́д и пра́вду, во́ином терпе́ние, му́жество и одоле́ние на враги́, си́рым и вдови́цам заступле́ние, боля́щим исцеле́ние, ю́ным благо́е в ве́ре возраста́ние, ста́рцем утеше́ние, оби́димым заступле́ние, и все́м вся́ ко вре́менней и ве́чней жи́зни потре́бная, я́ко да в ми́ре и покая́нии, жела́нием спасе́ния горя́ще, Го́сподеви рабо́тающе, до́брым по́двигом подвиза́ющеся, тече́ние на́ше сконча́ем и сподо́бимся в Небе́снем Ца́рствии ку́пно с ва́ми всегда́ пе́ти и сла́вити пресвято́е и великоле́пое и́мя Отца́, и Сы́на и Свята́го Ду́ха во ве́ки веко́в. Ами́нь.