Канон Недели Крестопоклонной
Предлагаем для домашнего чтения канон Постной Триоди преподобного Феодора Студита, читаемый во всех храмах на Утрене в Крестопоклонную неделю. Отличительной особенностью этого канона является пение ирмосов Пасхального канона «Воскресения день…». К сожалению, традиционно в Православных храмах они заменяются воскресными ирмосами текущего гласа.
Канон воодушевляет праведных для продолжения поприща Поста и напоминает нам о приближающемся светлом празднике Воскресения Христова. Поётся всю Крестопоклонную неделю, которая длится третью неделю (воскресенье) и всю четвёртую седмицу Великого Поста.
Песнь 1 · Песнь 3 · Седален · Песнь 4 · Песнь 5 · Песнь 6 · Кондак и икос · Песнь 7 · Песнь 8 · Песнь 9 · Светилен
Песнь 1.
Ирмос, глас 1: Воскресе́ния день, / просвети́мся, лю́дие. / Па́сха, Госпо́дня Па́сха, / от сме́рти бо к жи́зни, / и от земли́ к небеси́, / Христо́с Бог нас преведе́, / побе́дную пою́щия.
Припев: Слава Тебе, Боже наш, слава Тебе.
Торжества́ день, воста́нием Христо́вым, / смерть безве́стна показа́ся, / жи́зни возсия́ заря́, / Ада́м воста́в лику́ет ра́достию, / те́мже воскли́кнем, побе́дную пою́ще.
Припев: Слава Тебе, Боже наш, слава Тебе.
Поклоне́ния день честна́го Креста́, / прииди́те к сему́ вси, / воста́ния бо Христо́ва зари́, / светосия́яй предлага́ет ны́не, / того́ облобыза́им душе́вно ра́дующеся.
Припев: Слава Тебе, Боже наш, слава Тебе.
Яви́ся вели́кий Госпо́день Кре́сте, / покажи́ ми зрак Боже́ственный красоты́ твоея́ ны́не, / досто́йно покло́нника хвалы́ твоея́, / и́бо я́ко одушевле́нну тебе́, / и возглаша́ю, и облобыза́ю тя.
Припев: Слава Тебе, Боже наш, слава Тебе.
Да восхва́лят согла́сно не́бо и земля́, / я́ко предлежи́т всем всеблаже́ннейший Крест, / на не́мже пригвожде́н теле́сне пожре́ся Христо́с, / того́ лобыза́им душе́вно ра́дующеся.
Сла́ва Отцу́ и Сы́ну и Свято́му Ду́ху.
Троичен: О Тро́ице начерта́ньми! О Еди́нице зра́ком! / О́тче, Сы́не, и Ду́ше, / единоси́льная Еди́нице, / в сове́те и хоте́нии, и держа́вы нача́ле, мир Твой сохрани́, / мир подаю́щи.
И ны́не и при́сно и во ве́ки веко́в. Ами́нь.
Богородичен: Иску́са ника́коже ве́дущи му́жеска Де́во, / безсе́менно ражда́еши Младе́нца, / чи́сто но́сиши рожде́ние, / ми́ра Творца́ Христа́ Бо́га, / Того́ моли́ умири́ти вся́ческая.
Катавасия: Боже́ственнейший прообрази́ дре́вле Моисе́й, / в Чермне́м мо́ри / прове́д Изра́иля Кресто́м Твои́м, / во́ду жезло́м пресе́к, / песнь Тебе́ исхо́дную / воспева́я, Христе́ Бо́же.
Песнь 3.
Ирмос: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник / из гро́ба одожди́вша Христа́, / в Не́мже утвержда́емся.
Припев: Слава Тебе, Боже наш, слава Тебе.
Прииди́те, песнь пои́м но́ву, / разруше́ние а́дово торжеству́юще, / из гро́ба бо Христо́с воскре́се, / смерть плени́в, и спасе́ вся́ческая.
Припев: Слава Тебе, Боже наш, слава Тебе.
Прииди́те, почерпе́м ве́рнии, / не от исто́чника источа́ющаго во́ду тле́нную, / но от исто́чника просвеще́ния, / Креста́ Христо́ва поклоне́нием, / о не́мже и хва́лимся.
Припев: Слава Тебе, Боже наш, слава Тебе.
Дре́вле, его́же прообразова́ше Моисе́й дла́ньма, / Крест Твой ны́не облобыза́юще, / у́мнаго Амали́ка побежда́ем, Влады́ко Христе́, / и́мже и спаса́емся.
Припев: Слава Тебе, Боже наш, слава Тебе.
Очи́ма и устна́ма чи́стыма / пою́ще песнь ра́дования, / Госпо́дню Кресту́ ра́достию / поклони́мся ве́рнии, пле́щуще пе́сньми.
Сла́ва Отцу́ и Сы́ну и Свято́му Ду́ху.
Троичен: Еди́наго в трех Ипоста́сех Бо́га безнача́льнаго чту: / неразде́льнаго Существа́ зра́ком, / Отца́, Сы́на, и Ду́ха Жива́го, / в ни́хже крести́хомся.
И ны́не и при́сно и во ве́ки веко́в. Ами́нь.
Богородичен: В купине́ Моисе́й Твое́ обра́зно та́инство дре́вле, Чи́стая, ви́де, / я́коже бо о́ныя пла́мень, / огнь Божества́ Твою́ утро́бу не опали́.
Катавасия: Утверди́, Влады́ко Христе́, / Кресто́м на ка́мени мя ве́ры, / не поколеба́тися уму́ прило́ги врага́ зла́го, / еди́н бо еси́ Свят.
Седален, глас 6.
Крест Твой, Го́споди, освяти́ся, / в нем бо быва́ют исцеле́ния боля́щим во гресе́х, / и́мже Тебе́ припа́даем, поми́луй нас.
Стих: Возноси́те Го́спода Бо́га на́шего, и покланя́йтеся подно́жию но́гу Его́, / я́ко свя́то есть.
Днесь проро́ческое испо́лнися сло́во: / се бо покланя́емся, на ме́сто, / иде́же стоя́сте но́зе Твои́, Го́споди, / и дре́ва спасе́ния вкуси́вше, / грехо́вных страсте́й свобо́ду улучи́хом, / моли́твами Богоро́дицы, еди́не Человеколю́бче.
Сла́ва Отцу́ и Сы́ну и Свято́му Ду́ху.
То́кмо водрузи́ся дре́во, Христе́, Креста́ Твоего́, / основа́ния поколеба́шася сме́рти, Го́споди, / его́же бо поглоти́ жела́нием ад, отпусти́ тре́петом. / Яви́л еси́ нам спасе́ние Твое́, Святы́й, / и славосло́вим Тя, Сы́не Бо́жий, поми́луй нас.
И ны́не и при́сно и во ве́ки веко́в. Ами́нь.
Богородичен: Богоро́дице Де́во, моли́ Сы́на Твоего́ / пригво́ждшагося во́лею на Кресте́, / и воскре́сша из ме́ртвых, Христа́ Бо́га на́шего, / спасти́ся душа́м на́шим.
Песнь 4.
Ирмос: На Боже́ственней стра́жи / богоглаго́ливый Авваку́м / да ста́нет с на́ми, и пока́жет / светоно́сна А́нгела, / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.
Припев: Слава Тебе, Боже наш, слава Тебе.
Се воскре́се Христо́с, / мироно́сицам жена́м а́нгел реч́е: / не рыда́йте, ше́дше рцы́те апо́столом: / ра́дуйтеся, днесь спасе́ние ми́ру, / мучи́тельство врага́ сме́ртию разруши́ся.
Припев: Слава Тебе, Боже наш, слава Тебе.
Живоно́снаго Твоего́ Креста́, / покло́нную ра́дость днесь Христе́ срета́юще, / предсре́тение твори́м всесвяты́я стра́сти Твоея́, / ю́же во спасе́ние ми́ра / соде́лал еси́ Спа́се, я́ко всеси́лен.
Припев: Слава Тебе, Боже наш, слава Тебе.
Днесь быва́ет ра́дость на небеси́ и на земли́, / я́ко Христо́во зна́мение ми́ру явля́ется Крест треблаже́нный, / сей бо предложе́н быв, / источа́ет кла́няющимся ему́ ра́дость приснотеку́щую.
Припев: Слава Тебе, Боже наш, слава Тебе.
Что Ти принесе́м, Христе́, / я́ко честно́му Кресту́ дал еси́ нам поклони́тися? / На не́мже всесвята́я кровь Твоя́ излия́ся, / иде́же и плоть Твоя́ гвоздьми́ водрузи́ся, / его́же облобыза́юще ны́не благодари́м Тя.
Сла́ва Отцу́ и Сы́ну и Свято́му Ду́ху.
Троичен: Еди́наго Божества́ пою́ три Ипоста́си, / неразде́льно, есте́ственне про́сто пропове́дая, / Отца́ безнача́льна, Сы́на, и Ду́ха Свята́го сопресто́льна, / госпо́дство еди́но, и еди́но ца́рство, / еди́ну держа́ву присносу́щную.
И ны́не и при́сно и во ве́ки веко́в. Ами́нь.
Богородичен: Еди́на в жена́х яви́лася еси́ / вещь пречу́дна Чи́стая, слы́шание стра́шное, / естество́ бо Ты обнови́ла еси́, без се́мене ро́ждши, / пребыва́ющи па́ки я́коже пре́жде Де́ва, / роди́выйся бо из Тебе́, Бог есть и́стинный.
Катавасия: На Кресте́ Тя, Си́льне, / свети́ло вели́кое ви́дев, / тре́петом взя́тся, / лучи́ сопря́тав скры, / вся же тварь воспе́ со стра́хом Твое́ долготерпе́ние, / и́бо испо́лнися земля́ / Твоего́ хвале́ния.
Песнь 5.
Ирмос: У́тренюем у́треннюю глубоку́, / и вме́сто ми́ра песнь принесе́м Влады́це, / и Христа́ у́зрим / пра́вды Со́лнце, / всем жизнь возсия́юща.
Припев: Слава Тебе, Боже наш, слава Тебе.
Возсия́л еси́ от гро́ба, незаходи́мый Све́те, / ми́ру облиста́я нетле́ние, / потреби́л еси́, Го́споди, сме́ртный плач от коне́ц, / я́ко благоутро́бен.
Припев: Слава Тебе, Боже наш, слава Тебе.
Присту́пим очище́ннии воздержа́нием, / те́пле облобыза́юще во хвале́нии Дре́во всесвято́е, / на не́мже Христо́с распина́емь, / спасе́ мир, я́ко благоутро́бен.
Припев: Слава Тебе, Боже наш, слава Тебе.
Лику́ют в весе́лии а́нгельстии чи́ни, / днесь Креста́ Твоего́ поклоне́нием: / тем бо низложи́л еси́ бесо́вския полки́, / спасы́й, Христе́, челове́чество.
Припев: Слава Тебе, Боже наш, слава Тебе.
Рай други́й позна́ся Це́рковь, / я́коже пре́жде дре́во иму́щая живоно́сное, / Крест Твой, Го́споди, / из него́же прикоснове́нием безсме́ртию причасти́хомся.
Сла́ва Отцу́ и Сы́ну и Свято́му Ду́ху.
Троичен: Собезнача́льны три сла́влю, еди́наго Существа́: / Бо́га Отца́, Сы́на, и Ду́ха, / Свет еди́н трисия́тельный, / ку́пно держа́вное ца́рство, в неслия́нном то́ждестве.
И ны́не и при́сно и во ве́ки веко́в. Ами́нь.
Богородичен: Родила́ еси́ естества́ зако́ном, но па́че зако́на, / Тебе́ бо еди́ныя безсе́менно Рождество́, / стра́шный и помышля́емый нрав, / и глаго́лемый рожде́ния Твоего́, Всенепоро́чная.
Катавасия: У́тренююще Тя воспева́ем, Спа́се ще́дре, / мир обре́тше Кресто́м Твои́м, / и́мже обнови́л еси́ род челове́ческий / ко све́ту невече́рнему вводя́ нас.
Песнь 6.
Ирмос: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.
Припев: Слава Тебе, Боже наш, слава Тебе.
Воскре́сл еси́ смерть упраздни́в, Христе́, / я́коже вели́кий Царь, / от а́довых сокро́вищ воззва́л еси́ нас / в наслажде́ние Ца́рства Небе́снаго, в зе́млю безсме́ртия.
Припев: Слава Тебе, Боже наш, слава Тебе.
Пле́щуще пе́сньми Боже́ственными, ве́рнии, воскли́кнем Бо́гу, / Крест Госпо́день целу́юще, / освяще́ния бо источа́ет исто́чник, всем су́щим в ми́ре.
Припев: Слава Тебе, Боже наш, слава Тебе.
Исполня́ется песнописа́тельный глас: / се бо покланя́емся пречи́стых ног Твои́х подно́жию Всеси́льне, / Кресту́ Твоему́ честно́му, тривожделе́нному дре́ву.
Припев: Слава Тебе, Боже наш, слава Тебе.
Е́же ви́де дре́во в Твой хлеб вложе́ное, во проро́цех рыда́тель, / Крест Твой, Ще́дре, облобыза́юще, / воспева́ем Твоя́ у́зы, и погребе́ние, копие́ же и гво́здия.
Припев: Слава Тебе, Боже наш, слава Тебе.
На ра́мех его́же изво́лил еси́, Христе́, носи́ти святы́й Крест, / и на сем вознести́ся, и распя́тися пло́тию, / облобыза́юще собира́ем кре́пость на враги́ неви́димыя.
Сла́ва Отцу́ и Сы́ну и Свято́му Ду́ху.
Троичен: Еди́ницу в трех начерта́ниих пою́, / и Тро́ицу во еди́ном естестве́ покланя́емую, / Бо́га тро́е ку́пно, Свет трисо́лнечный, / Отца́, и Сы́на, и Свята́го Ду́ха.
И ны́не и при́сно и во ве́ки веко́в. Ами́нь.
Богородичен: Чуде́с вели́кое чу́до в Тебе́ яви́ся нескве́рная А́гнице, / взе́млющаго бо ми́ра грех, А́гнца родила́ еси́, / Его́же моли́ приле́жно о пою́щих Тя.
Катавасия: О́браз Боже́ственнаго Креста́, / Ио́на во чре́ве ки́тове / просте́ртыма дла́ньма проначерта́, / и взира́ше спасе́н от зве́ря / си́лою Твое́ю, Сло́ве.
Кондак, глас 7.
Не ктому́ пла́менное ору́жие храни́т врат Еде́мских, / на ты́я бо на́йде пресла́вный соу́з дре́во Кре́стное, / сме́ртное жа́ло и а́дова побе́да прогна́ся, / предста́л бо еси́, Спа́се мой, вопия́ су́щим во а́де: / вни́дите па́ки в рай.
Икос.
Три кресты́ водрузи́ на Голго́фе Пила́т, / два разбо́йников, и еди́н Жизнода́вца. / Его́же ви́де ад, и рече́ су́щим до́ле: / о слуги́ мои́, и си́лы моя́! / Кто водрузи́в гво́здие в се́рдце мое́, / древяны́м мя копие́м внеза́пу прободе́? / И растерза́юся, вну́тренними мои́ми болю́, утро́бою уязвля́юся, / чу́вства моя́ смуща́ют дух мой, / и понужда́ются изрыга́ти Ада́ма, и су́щия от Ада́ма, дре́вом да́нныя ми: / Дре́во бо сия́ вво́дит па́ки в рай.
Песнь 7.
Ирмос: О́троки от пе́щи изба́вивый, / быв Челове́к, / стра́ждет я́ко сме́ртен, / и стра́стию сме́ртное, / в нетле́ния облачи́т благоле́пие, / Еди́н благослове́н / отце́в Бог и препросла́влен.
Припев: Слава Тебе, Боже наш, слава Тебе.
Воскре́сл еси́ из гро́ба тридне́вно, я́ко спяй, Го́споди, / а́довы вра́тари порази́в Боже́ственною си́лою, / и дре́вния воздви́г пра́отцы / еди́не благослове́нный / отце́в Бо́же и препросла́вленный.
Припев: Слава Тебе, Боже наш, слава Тебе.
Цевни́цею пе́сней лику́юще / возра́дуемся днесь лю́дие Кре́стным поклоне́нием / на сем пригвозди́вшагося Христа́ сла́вяще, / еди́наго благослове́ннаго / отце́в Бо́га и препросла́вленнаго.
Припев: Слава Тебе, Боже наш, слава Тебе.
Показа́вый умерщвле́ния орга́н, жи́зни де́лателище, / ми́ру облобыза́тельное, Твой Крест Всеще́дре, / тому́ покланя́ющияся освяти́, / еди́не благослове́нный / отце́в Бо́же и препросла́вленный.
Припев: Слава Тебе, Боже наш, слава Тебе.
Еди́не ми́лостиве и благоутро́бне, просвети́, / освяти́ еди́не Иису́се, / покланя́ющияся ве́рно Твоему́ Кресту́, / и Боже́ственным страда́нием, / еди́не благослове́нный / отце́в Бо́же и препросла́вленный.
Сла́ва Отцу́ и Сы́ну и Свято́му Ду́ху.
Троичен: Еди́ницу в трех Ипоста́сех, пою́ Божество́: / Свет бо Оте́ц, Свет Сын, Свет Дух, / Све́ту неразде́льну пребыва́ющу, / еди́нством есте́ственным, / и треми́ луча́ми Лиц сия́ющу.
И ны́не и при́сно и во ве́ки веко́в. Ами́нь.
Богородичен: Всех проро́к многоимени́тое Ты еси́ пропове́дание, / врата́ бо Бо́жия, ру́чка злата́я, земля́ свята́я, / яви́лася еси́ Де́во Богоневе́стная, / ро́ждшая пло́тию Иису́са Христа́, / отце́в Бо́га и препросла́вленна.
Катавасия: Из пла́мене о́троки избавле́й, / плоть прии́м прише́л еси́ на зе́млю, / и на Кресте́ пригвожде́н, / спасе́ние нам дарова́л еси́, Христе́, / еди́н благослове́н отце́в Бо́же, / и препросла́влен.
Песнь 8.
Ирмос: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.
Припев: Слава Тебе, Боже наш, слава Тебе.
Ми́ро в рука́х что держите́ вся́ко? / Кого́ же взыску́ете? / Ны́не явле́йся ю́ноша во гро́бе, вопия́: / воскре́се Христо́с и Бог наш, / возста́вивый естество́ челове́ков от а́довых сокро́вищ.
Припев: Слава Тебе, Боже наш, слава Тебе.
Ра́дуйся требога́тое дре́во и Боже́ственное, Кре́сте, / све́те су́щим во тьме, / четвероконе́чный мир сия́нием твои́м, / воста́ния Христо́ва проявле́й зари́, / сподо́би вся ве́рныя дости́гнути Па́сху.
Припев: Слава Тебе, Боже наш, слава Тебе.
В сий день благоуха́ют ми́ра боже́ственныя мирополо́жницы, / живоми́рственное дре́во Крест Христо́в, / обоня́им его́ Богодухнове́нныя вони́, / тому́ покланя́ющеся ве́рно во ве́ки.
Припев: Слава Тебе, Боже наш, слава Тебе.
Гряди́ Елиссе́е проро́че, / рцы я́ве, что дре́во о́ное, / е́же в во́ду вложи́л еси́? / Крест Христо́в, и́мже от глубины́ тли извлеко́хомся, / тому́ покланя́ющеся ве́рно во ве́ки.
Припев: Слава Тебе, Боже наш, слава Тебе.
Дре́вле Иа́ков прообразу́я Крест Твой, Христе́, / Ио́сиф покланя́шеся Боже́ственнаго жезла́ кра́еви, / скиптр сей стра́шный Ца́рствия Твоего́ предви́дев: / ему́же ны́не покланя́емся ве́рно во ве́ки.
Благослови́м Отца́ и Сы́на и Свята́го Ду́ха, Го́спода.
Троичен: Еди́но в трех начерта́ниих Существо́ сла́вя, / не слива́ю единоли́чно трех, ниже́ пресеца́ю зра́ка, / Отца́, и Сы́на, со Ду́хом: / Еди́н бо над все́ми Бог в Тро́ице.
И ны́не и при́сно и во ве́ки веко́в, ами́нь.
Богородичен: Еди́на в ма́терех яви́лася еси́, / Де́ва Богоневе́сто Мари́е, / без му́жа роди́вши Христа́ Спа́са, / чистоты́ зна́мение сохрани́вши: / Тебе́ ублажа́ем ве́рнии во ве́ки.
Катавасия: Ру́це в ров ве́рженый львов, / иногда́ вели́кий во проро́цех, / крестообра́зно просте́р Дании́л, / неврежде́н от сих сне́ди спасе́ся, / благословя́ Христа́ Бо́га во ве́ки.
Песнь 9.
Ирмос: Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́, / лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
Припев: Слава Тебе, Боже наш, слава Тебе.
Во гроб соше́л еси́ жизнода́вче и Бо́же, / и сокруши́л еси́ вся закле́пы же и вереи́, / и ме́ртвыя воскреси́л еси́, / сла́ва воста́нию Твоему́, вопию́щия, / Христе́ Спа́се всеси́льне.
Припев: Слава Тебе, Боже наш, слава Тебе.
Гроб Твой жизнь мне Христе́ источи́, содержа́й бо жизнь, / предста́в возопи́л еси́ живу́щим во гробе́х: / су́щии во у́зах разреши́теся, / Аз бо ми́ра избавле́ние приидо́х.
Припев: Слава Тебе, Боже наш, слава Тебе.
Пе́сньми да взыгра́ют вся древа́ дубра́вная, / тезоимени́тое дре́во Креста́ зря́ще облобыза́емое днесь: / на не́мже Христо́с вознесе́ главу́, / я́коже проро́чествует боже́ственный Дави́д.
Припев: Слава Тебе, Боже наш, слава Тебе.
Дре́вом уме́рый, дре́во тя обрето́х жи́зни, Христоно́сне Кресте́ мой, / храни́телю мой неруши́мый, / на де́моны кре́пкая держа́во, / тебе́ покланя́яйся днесь зову́: / освяти́ мя сла́вою твое́ю.
Припев: Слава Тебе, Боже наш, слава Тебе.
Весели́ся, ра́дуйся, Це́рковь Бо́жия, / дре́ву требога́тному покланя́ющися днесь, / всесвята́го Креста́ Христо́ва: / Ему́же слу́жат чи́нове а́нгельстии, / и со стра́хом предстоя́т.
Сла́ва Отцу́ и Сы́ну и Свято́му Ду́ху.
Троичен: Тро́ице Ли́цы, еди́нице Естество́м покланя́юся, / Тебе́ Божество́ Свято́е, / Отцу́, и Сы́ну, со Святы́м же Ду́хом, / еди́ному нача́лу, еди́ному Ца́рству, / все́ми влады́чествующему.
И ны́не и при́сно и во ве́ки веко́в, ами́нь.
Богородичен: Гора́ вели́кая в ню́же всели́ся Христо́с, / Ты яви́лася еси́ Де́во, / я́коже боже́ственный Дави́д вопие́т: / Е́юже мы вознесо́хомся к небеси́, / всыни́вшеся Ду́хом Всеблаже́нная.
Катавасия: О Ма́ти Де́во, / и Богоро́дице нело́жная, / ро́ждшая безсе́менно Христа́ Бо́га на́шего, / на Крест возне́сшагося пло́тию, / Тя ве́рнии вси досто́йно с Ним ны́не велича́ем.
Светилен.
Крест Христо́в честны́й / днесь предложе́нный ви́девше поклони́мся, / и ве́рно возвесели́мся, облобыза́юще любо́вию, / на сем во́лею распе́ншагося прося́ще Го́спода, сподо́бити всех нас, / и Кресту́ честно́му поклони́тися, / и дости́гнути Воскресе́ние неосужде́нно.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в, ами́нь.
Богородичен: Дре́ву, на не́мже Всечи́стая, / пречи́стеи дла́ни о нас простре́, / пригвозди́выйся Сын Твой, / ны́не благоче́стно покланя́ющимся, / даждь нам мир, и мироспаси́тельныя всечестны́я стра́сти предвари́ти, / и све́тлой мирора́достной господоимени́той Па́сце поклони́тися, и светоно́сному дню.