Канон молебный священномученику Харалампию, читаемый во всякой скорби и душевном обстоянии
Предлагаем для домашней молитвы особый канон священномученику Харалампию Магнезийскому, творение преподобного Никодима Святогорца. Именно этот канон читался в храмах и домах благочестивых христиан во время эпидемии короновирусной инфекции. Для удобства навигации можно использовать ссылки на каждую песнь канона, представленные ниже.
Кано́н — это особый жанр Православной богослужебной гимнографии, основанный на библейских песнях и посвящённый прославлению какого-либо праздника или святого. Канон входит в состав Утрени (обычно во время этой службы соединяются сразу несколько канонов) и некоторых других Богослужений, а также может совершаться на молебнах и в келейной (домашней) молитве. Полный канон состоит из девяти частей — песней, однако все девять песней используются редко, каждая песнь содержит несколько тропарей, каждый из которых предваряется определённым припевом.
Песнь 1 · Песнь 3 · Седален · Песнь 4 · Песнь 5 · Песнь 6 · Кондак · Песнь 7 · Песнь 8 · Песнь 9 · Молитва
Песнь 1.
Ирмос, глас 8: Воду прошед, яко сушу,/ и египетскаго зла избежав,/ израильтянин вопияше:// Избавителю и Богу нашему поим.
Припев: Священному́чениче Харала́мпие, моли́ Бо́га о на́с.
Сый во мнозех напастех, губительстве и бедах всяческих, к тебе с верою вопию, да избавлюся молитвами твоими, Харалампие.
Припев: Священному́чениче Харала́мпие, моли́ Бо́га о на́с.
Капища идольская разрушив, церковь Божию узре, источниче ты чудотворный, гонителю пагубных и напастей отвергающий, Харалампие.
Сла́ва Отцу́ и Сы́ну и Свято́му Ду́ху.
Яко жертва и мученик Христов, имея дерзновение, молитвами избави нас пагубных и зол, и бед, напасти отвергающий, Харалампие.
И ны́не и при́сно и во ве́ки веко́в. Ами́нь.
Богородичен: Едину Неискусомужную и Чистую молим Тя, раби Твои, губительства, вреда да избави.
Песнь 3.
Ирмос: Небеснаго круга/ Верхотворче, Господи,/ и Церкве Зиждителю,/ Ты мене утверди/ в любви Твоей, желаний краю,// верных утверждение, Едине Человеколюбче.
Припев: Священному́чениче Харала́мпие, моли́ Бо́га о на́с.
Лютых недуг и бед волнами от грех поистине вся ниспали есмы в лукавое, но теплыми молитвами нас свободи, Божественный Харалампие.
Припев: Священному́чениче Харала́мпие, моли́ Бо́га о на́с.
Изнемогающих от губительнаго — цельба, беду приявших — быстрое заступление и печалующихся радость. Темже нас молитвами свободи, Божественный Харалампие.
Сла́ва Отцу́ и Сы́ну и Свято́му Ду́ху.
От болезней всяческих, помышлений бесовских, скорбей, пагубы лютой, бед злых всех нас своими молитвами свободи, Божественный Харалампие.
И ны́не и при́сно и во ве́ки веко́в. Ами́нь.
Богородичен: От погибели, зол, Пречистая, всяческаго вреда, пагубы и обстояния Харалампия мольбами и Твоими молитвами всех нас свободи, Дево Богоневестная.
Седален, глас 2.
Молитвами твоими ко Господу от зол, бед, напастей свободи верно к тебе прибегающих и сетей избави вражиих, велий страстотерпче Харалампие.
Песнь 4.
Ирмос: Услышах, Господи,/ смотрения Твоего таинство,/ разумех дела Твоя// и прославих Твое Божество.
Припев: Священному́чениче Харала́мпие, моли́ Бо́га о на́с.
Слугу тя равноангельна и исповедника Христос тя показа и болезней целителя, велий Харалампие.
Припев: Священному́чениче Харала́мпие, моли́ Бо́га о на́с.
Изнемогающаго мя исцели, в напастех суща мя исхити и свободи твоими молитвами, велий Харалампие.
Сла́ва Отцу́ и Сы́ну и Свято́му Ду́ху.
Возвеличи Господь тя в мире, благодать подал еси всем исцелити недуги, велий Харалампие.
И ны́не и при́сно и во ве́ки веко́в. Ами́нь.
Богородичен: Целительницу Тя разумеем, от зол, губительства и обстояния избави нас молитвами Твоими к Богу, Пречистая Богородице.
Песнь 5.
Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,// Человеколюбче.
Припев: Священному́чениче Харала́мпие, моли́ Бо́га о на́с.
Прибегаем к тебе от конец всего мира вси, иже в напастех суще, молитвами твоими избави от сих, мучениче Харалампие.
Припев: Священному́чениче Харала́мпие, моли́ Бо́га о на́с.
Со чины святых всех, святе, беседуя прямо Христу, от бед мя избави, мучениче Харалампие.
Сла́ва Отцу́ и Сы́ну и Свято́му Ду́ху.
Весь в напастех, в пагубах и в зле пребываю, от всяких бед твоими мольбами мя избави, мучениче Харалампие.
И ны́не и при́сно и во ве́ки веко́в. Ами́нь.
Богородичен: Яко страшна нам тайна Суднаго дне, Владычице, трепетом велиим содержит и ужасает, но молитвами Харалампия избави, Пречистая, Всенепорочная, осуждения нас.
Песнь 6.
Ирмос: Молитву пролию ко Господу/ и Тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:// от тли, Боже, возведи мя.
Припев: Священному́чениче Харала́мпие, моли́ Бо́га о на́с.
Струями ты многими исцели злыя пагубы губительство, и из многих напастей и бед бури мя изыми и, молюся, твоими молитвами утиши ю, Харалампие.
Припев: Священному́чениче Харала́мпие, моли́ Бо́га о на́с.
Осени благодатию душу мою, святе, очеса разума и сердца к свету Христовых дел твоею молитвою, всеблаженне, приведи и, молюся, неистия тление утиши, мучениче Харалампие.
Сла́ва Отцу́ и Сы́ну и Свято́му Ду́ху.
Нетленное сокровище тя ведахом и источник сый цельбы, всеблаженне, яко из тебе излияется благодать исцеляти недуги, и, молюся, твоими молитвами утиши я, Харалампие.
И ны́не и при́сно и во ве́ки веко́в. Ами́нь.
Богородичен: Неневестная Богородице, Госпоже, бед и напастей пагубу Харалампия теплыми мольбами разори и, молюся, злое тление утиши, Всепетая.
Кондак, глас 6.
Яко мученик и исповедник цвет, двойным венцем Христос тя увенча, возвеличив безчисленными чудесы на земли, но яко благодать Господню являя нам, верно к тебе прибегающим, даруй мир, помози в напастех и лютых бедах, святейший Харалампие.
Песнь 7.
Ирмос: От Иудеи дошедше, отроцы/ в Вавилоне иногда/ верою Троическою пламень пещный попраша, поюще:// отцев Боже, благословен еси.
Припев: Священному́чениче Харала́мпие, моли́ Бо́га о на́с.
Избавиться невидимых и видимых враг, борющих нас, всеблаженне, умоли Христа твоими, священномучениче Харалампие, молитвами.
Припев: Священному́чениче Харала́мпие, моли́ Бо́га о на́с.
Трудами твоими благими разори идолом злое служение, Христос же тебе благодать чудес даровал есть исцеляти болезни твоими, священномучениче Харалампие, молитвами.
Сла́ва Отцу́ и Сы́ну и Свято́му Ду́ху.
Множество православных, одержимии печальми от злых, к тебе с благочестием и с любовию возопиют, да избави лютых твоими, священномучениче Харалампие, молитвами.
И ны́не и при́сно и во ве́ки веко́в. Ами́нь.
Богородичен: Спасти от напастей, бед всюду и злых, нас, ближних своих, Христа Рождшую тихо умоли твоими, священномучениче Харалампие, молитвами.
Песнь 8.
Ирмос: Царя Небеснаго,/ Егоже поют вои Ангельстии,// хвалите и превозносите во вся веки.
Припев: Священному́чениче Харала́мпие, моли́ Бо́га о на́с.
Иже чудес у Господа благодать взявый, болезнь и пагубу изгони мольбами твоими, Харалампие треблаженне.
Припев: Священному́чениче Харала́мпие, моли́ Бо́га о на́с.
Вверг твоих раб лукавый в многоразличныя недуги лютыя, но сих изгони, Харалампие треблаженне.
Благослови́м Отца́, и Сы́на, и Свята́го Ду́ха Го́спода.
Поток недуг, и пагуб, и напастей, и злое обстояние изгони мольбами твоими, Харалампие треблаженне.
И ны́не и при́сно и во ве́ки веко́в. Ами́нь.
Богородичен: Всяк вред душ и телес и всякую злую напасть изгони мольбами Твоими, Марие Богородице.
Песнь 9.
Ирмос: Воистину Богородицу,/ Тя исповедуем, спасеннии Тобою, Дево Чистая,// с Безплотными лики Тя величающе.
Припев: Священному́чениче Харала́мпие, моли́ Бо́га о на́с.
Всякими болезнями одержимыя и благочестно притекающии ко храму твоими молениями вся избави, мучениче Харалампие.
Припев: Священному́чениче Харала́мпие, моли́ Бо́га о на́с.
Пагубы губительныя, всякия немощи, помышления душетленнаго враг лукавых твоими молениями вся избави, мучениче Харалампие.
Сла́ва Отцу́ и Сы́ну и Свято́му Ду́ху.
Иже вся спасаяй, тя призывающия, и ныне от разрушений и всякия погибели твоими молениями вся избави, мучениче Харалампие.
И ны́не и при́сно и во ве́ки веко́в. Ами́нь.
Богородичен: Погибели лютыя верных Твоих раб, бед злых Харалампия молитвами, Твоими молениями вся избави, Дево Преблаженная.
Молитва.
О, священнейшая главо, пастырю добрый словесных овец Христовых, священномучениче Христов Харалампие, великий о нас заступниче в скорбех и бедах и во всех нуждах! Услыши нас, грешных и недостойных раб твоих, молящихся тебе, да твоими всесильными молитвами Всеблагий Господь избавит ны от всякаго злаго обстояния, простит вся согрешения, вольная и невольная, сподобит ны прочая лета жизни нашея скончати в соблюдении заповедей Его и покаянии. Испроси, угодниче Божий, да пребудет благословение Царя Небеснаго над благословенною им Россиею. Ты бо приял еси еще в житии своем от Господа силу всем притекающим к тебе с мольбою подавати потребное, темже и старцы, и возрастнии, и дети приимаху исцеления ради ходатайства твоего, угодниче, пред Престолом Господа. Егда же на мечное тя усечение осудиша, слышал еси превожделенный и сладчайший глас Господа, глаголющ к тебе сицевая: прииди, Харалампие, друже мой, многая ради Имене Моего претерпевый, проси у Мене, чесо хощеши, и дам ти. Ты же, великий светильниче, рекл еси Ему усты своими: Господи, аще угодно Тебе есть, молю Тя, даждь славу Имени Твоему, идеже положены будут моя мощи и память моя имать почитатися, да не будет на месте том глад и мор или тлетворный воздух, погубляющ плоды, но да будет паче на местех тех мир, телесем здравие и душам спасение, изобилие же пшеницы и вина и скотов умножение на потребу человеком. И тако по прошению твоему приял еси от Господа велию благодать. На твоя моления, на тя, священномучениче Христов Харалампие, уповаем, получити велию милость от Господа в безконечный век. Аминь.